ஷாருக்கானை வைத்து புதிய படம் இயக்குவதாக வெளியான தகவலில் ஒருதுளி கூட உண்மையில்லை என்று இயக்குநர் வெற்றி மாறன் தெரிவித்துள்ளார்.
பொல்லாதவன், ஆடுகளம், வட சென்னை ஆகிய படங்களைத் தொடர்ந்து, இயக்குநர் வெற்றி மாறன் – தனுஷ் கூட்டணியில் வெளியான படம் அசுரன். உலகம் முழுவதும் வெளியான இப்படம் விமர்சன ரீதியாக நல்ல வரவேற்புப் பெற்றது. தமிழகத்தில் மட்டும் ரூ.10 கோடிக்கும் அதிகமாக வசூல் கொடுத்த இப்படம் உலகம் முழுவதும் ரூ.100 கோடிக்கும் அதிகமாகவே வசூல் குவித்துள்ளது.
இந்த நிலையில், இயக்குநர் வெற்றி மாறன், பாலிவுட் நடிகர் ஷாருக்கானை சந்தித்த புகைப்படம் ஒன்று சமூக வலைதளங்களில் வைரலானது. இதன் மூலம், ஷாருக்கான் வெற்றி மாறன் இயக்கத்தில் புதிய படத்தில் நடிக்கிறார் என்று செய்தி வெளியானது.
இதற்கு விளக்கம் கொடுக்கும் வகையில், வெற்றி மாறன் கூறுகையில், சமீபத்தில் வெளியான அசுரன் படத்தை ஷாருக்கான் பார்த்துள்ளார். அதன் பிறகு என்னை சந்திக்க விரும்பியுள்ளார் என்று கூறியுள்ளார். அண்மையில், மும்பை சென்றிருந்த வெற்றி மாறன் ஷாருக்கானை சந்தித்து பேசியுள்ளார் என்பது குறிப்பிடத்தக்கது.
இதற்கு முன்னதாக, பிகில் இயக்குநர் அட்லி இயக்கத்தில் ஷாருக்கான் சங்கி என்ற படத்தில் நடிக்க இருக்கிறார் என்று தகவல் வெளியானது. இது குறித்து அதிகாரப்பூர்வ அறிவிப்பு ஷாருக்கானின் பிறந்தநாளன்று வெளியாகும் என்று எதிர்பார்க்கப்பட்டது. ஆனால், இதுவரை வெளியாகவில்லை என்பது குறிப்பிடத்தக்கது.
* இந்த பதிவு உங்களுக்கு பிடித்திருந்தால் உங்கள் நண்பர்களுடன் பகிர்ந்து கொள்ளுங்கள். நன்றி!
