தலைவர் 168 படத்தின் ஹீரோயின் குறித்த அறிவிப்பு வெளியானதை பார்த்தவர்கள் ரஜினி நிச்சயம் வாக்கு தவற மாட்டார் என்று தெரிவித்துள்ளார்கள்.
ரஜினி படத்தில் கீர்த்தி
தர்பார் படத்தை அடுத்து ரஜினிகாந்த் சிறுத்தை சிவா இயக்கத்தில் தலைவர் 168 படத்தில் நடிக்கிறார். அந்த படத்தில் மீனா, மஞ்சு வாரியர், ஜோதிகா அல்லது கீர்த்தி சுரேஷ் ஹீரோயினாக நடிக்கக்கூடும் என்று கூறப்பட்டது. இந்நிலையில் கீர்த்தி சுரேஷ் தலைவர் 168 படத்தில் நடிப்பதாக சன் பிக்சர்ஸ் நிறுவனம் அறிவிப்பு வெளியிட்டுள்ளது. இனியும் தன் மகள்களை விட வயதில் சின்ன நடிகைகளுடன் டூயட் பாட மாட்டேன் என்று ரஜினி தெரிவித்தார். அதனால் ஐஸ்வர்யா மற்றும் சவுந்தர்யாவை விட சின்னவரான கீர்த்தி சுரேஷுடன் ரஜினி நிச்சயம் ரொமான்ஸ் செய்ய மாட்டார் என்று நம்பப்படுகிறது.
தர்பார் ஹீரோயின்
முன்னதாக தர்பார் படத்தில் ரஜினிக்கு ஜோடியாக கீர்த்தி சுரேஷை நடிக்க வைக்க விரும்பினார் ஏ.ஆர். முருகதாஸ். ஆனால் ரஜினி தான் கீர்த்தி சின்னப் பெண் வேண்டாம் என்று கூறி நயன்தாராவை பரிந்துரை செய்ததாக செய்திகள் வெளியாகின. அப்படி இருக்கும்போது தற்போது ரஜினி படத்தில் கீர்த்தி சுரேஷ் நடிக்க உள்ளார். சேர்ந்து நடித்தாலும் அவர்களுக்கு இடையே காதல் காட்சிகள் இருக்காது என்று நம்பப்படுகிறது.
தீபாவளிக்கு தலைவர் 168
தலைவர் 168 படத்தின் ஷூட்டிங் ரஜினியின் பிறந்தநாளான டிசம்பர் 12ம் தேதி துவங்கும் என்று கூறப்படுகிறது. படம் அடுத்த ஆண்டு தீபாவளிக்கு ரிலீஸாகுமாம். அடுத்த ஆண்டு பொங்கல் மற்றும் தீபாவளி என்று இரண்டு பண்டிகைகளுக்குமே ரஜினி படங்கள் ரிலீஸாகிறது. தலைவர் 168 படத்திற்கு இமான் இசையமைக்கிறார். இந்த படத்தில் சூரி, பிரகாஷ் ராஜ் ஆகியோர் முக்கிய கதாபாத்திரங்களில் நடிக்கிறார்கள் என்பது குறிப்பிடத்தக்கது.
கீர்த்தி மகிழ்ச்சி
ரஜினியுடன் சேர்ந்து ஒரு படத்திலாவது நடிக்க மாட்டோமா என்று எத்தனையோ நடிகைகள் ஏங்க அந்த வாய்ப்பு கீர்த்தி சுரேஷுக்கு கிடைத்துள்ளது. முதல் முறையாக ரஜினியுடன் சேர்ந்து நடிப்பதில் மிகவும் மகிழ்ச்சியாக உள்ளார் கீர்த்தி. அந்த மகிழ்ச்சியை ட்விட்டரில் தனது ரசிகர்களுடன் பகிர்ந்து கொண்டுள்ளார். அவரின் ட்வீட்டை பார்த்த ரசிகர்கள் அவருக்கு வாழ்த்து தெரிவித்துள்ளனர்.
* இந்த பதிவு உங்களுக்கு பிடித்திருந்தால் உங்கள் நண்பர்களுடன் பகிர்ந்து கொள்ளுங்கள். நன்றி!
