நேர்கொண்ட பார்வை படத்தை அடுத்து அஜித் மீண்டும் ஹெச். வினோத் இயக்கத்தில் நடிக்கிறார் என்பது அனைவருக்கும் தெரியும். தற்போதைக்கு தல 60 என்று பெயர் வைக்கப்பட்டுள்ள அந்த படத்தின் ஷூட்டிங் கடந்த மாதம் துவங்கும் என்று தெரிவிக்கப்பட்டது. ஆனால் அறிவித்தபடி படப்பிடிப்பை துவங்கவில்லை.
இந்நிலையில் படப்பிடிப்பை டிசம்பர் மாதத்திற்கு தள்ளிப் போட்டுள்ளார்களாம். ப்ரீ-ப்ரொடக்ஷன் பணிகள் தாமதமாகியுள்ளதால் படப்பிடிப்பை அறிவித்தபடி துவங்க முடியவில்லையாம்.
அஜித்திற்கு தனது படத்தை தல 59, தல 60 என்று அழைப்பது பிடிக்காது. இதையடுத்து தல 60 படத்திற்கு நல்ல பெயரை தேர்வு செய்துவிட்டார்களாம். இந்த படத்தில் அஜித் போலீஸ் அதிகாரியாக அதுவும் இளமையான தோற்றத்தில் நடிப்பது தான் தல ரசிகர்களை உற்சாகம் அடைய வைத்துள்ளது.
அஜித் முன்னதாக ஆரம்பம், என்னை அறிந்தால், மங்காத்தா ஆகிய படங்களில் போலீஸ் அதிகாரியாக நடித்துள்ளார். தல 60 படத்தில் அஜித்தின் கதாபாத்திரம் மிகவும் வித்தியாசமானதாக இருக்குமாம். இந்த படத்தில் அஜித் மகளாக அனிகா நடிக்கிறார் என்பது தெரியும்.
மற்றபடி யார், யார் நடிக்கிறார்கள் என்ற தகவல் இதுவரை வெளியாகவில்லை. அனிகாவுக்கு அம்மாவாக நடிப்பது என்றால் நயன்தாரா தான் பொருத்தமாக இருப்பார் என்கிறார்கள் ரசிகர்கள். முன்னதாக கடந்த ஜனவரி மாதம் வெளியான விஸ்வாசம் படத்தில் அனிகாவின்அம்மாவாக நயன் நடித்திருந்தார் என்பது குறிப்பிடத்தக்கது.
நேர்கொண்ட பார்வை போன்று தல 60 படம் ரீமேக் கிடையாது. வினோத் அஜித்துக்காகவே எழுதியுள்ள சூப்பர்ஆக்ஷன் கதையாகும். ஆக, நல்ல செய்தி படத்திற்கு தலைப்பு தேர்வு செய்யப்பட்டுள்ளது. கெட்ட செய்தி, படப்பிடிப்பு தள்ளிப் போயுள்ளது.
* இந்த பதிவு உங்களுக்கு பிடித்திருந்தால் உங்கள் நண்பர்களுடன் பகிர்ந்து கொள்ளுங்கள். நன்றி!
