தளபதி 64 படத்தில் விஜய்யுடன் சேர்ந்து நடித்துக் கொண்டிருப்பது குறித்து கௌரி கிஷன் மனம் திறந்து பேசியுள்ளார்.
தளபதி 64ல் குட்டி ஜானு
96 படத்தில் இளம் வயது த்ரிஷாவாக நடித்து பிரபலமான கௌரி கிஷன் தற்போது தளபதி 64 படத்தில் முக்கியமான கதாபாத்திரத்தில் நடித்து வருகிறார். ஒரே படத்தில் கோலிவுட் ரசிகர்கள் அனைவரின் கவனத்தையும் ஈர்த்த அவருக்கு இரண்டாவது படத்திலேயே விஜய்யுடன் சேர்ந்து நடிக்கும் வாய்ப்பு கிடைத்துள்ளது. இது தவிர அவர் மலையாள படம் ஒன்றில் நடித்து முடித்துள்ளார். மேலும் குறும்படம் ஒன்றிலும் நடித்துள்ளார். இந்நிலையில் அவர் தளபதி 64 பற்றியும், தனது கெரியர் பற்றியும் தெரிவித்துள்ளார்.
டெல்லியில் கௌரி
லோகேஷ் கனகராஜ் இயக்கி வரும் தளபதி 64 படத்தின் படப்பிடிப்பில் டெல்லியில் உள்ளேன். நான் சுமார் ஒரு வாரமாக இங்கு தான் இருக்கிறேன். 96 படம் ரிலீஸான பிறகு பல பட வாய்ப்புகள் என்னைத் தேடி வந்தது. ஆனால் நான் படங்களை தேர்வு செய்வதில் அவசரப்படவில்லை. தளபதி 64 படக்குழு அணுகியபோது விஜய் படம் என்று மகிழ்ச்சி அடைந்தேன். லோகேஷை அவர் அலுவலகத்தில் சந்தித்து பேசினேன். கதை மற்றும் என் கதாபாத்திரம் குறித்து அவர் விவரித்தார். அந்த கதாபாத்திரத்திற்கு நான் எப்படி பொருத்தமாக இருப்பேன் என்றும் கூறினார். ஆடிஷன் வைத்தார்கள். படப்பிடிப்பு நன்றாக சென்று கொண்டிருக்கிறது என்றார் கௌரி.
விஜய்யை பார்த்தேன்
நான் செட்டில் வைத்து தான் விஜய்யை முதன்முதலாக சந்தித்தேன். அவர் செட்டுக்கு வந்ததும் அவருக்கு மரியாதை கொடுக்கும் வகையில் அனைவரும் அமைதியாகிவிட்டனர். அவர் என்னை பார்த்ததும், சிரித்தார், மேலும் 96 படத்தில் என் நடிப்பை பாராட்டினார். நான் ஒரேயொரு படத்தில் தான் நடித்திருக்கிறேன். அப்படி இருந்தும் விஜய்க்கு நான் யார் என்று தெரிகிறதே என்பதை நினைத்து மகிழ்ச்சியாக இருந்தது. விஜய் மிகவும் எளிமையானவர். அவர் நடித்த படங்களிலேயே எனக்கு மெர்சல் தான் பிடிக்கும் என்று கௌரி கூறினார்.
மெர்சல் தான் பிடிக்கும்
தளபதி 64 படத்தில் என் கதாபாத்திரம் குறித்து பெரிதாக எதுவும் கூற முடியாது. இது ஜானு மாதிரி இல்லாமல் வித்தியாசமாக இருக்கும். என் வயதை மனதில் வைத்து நீங்களே என் கதாபாத்திரம் குறித்து யூகிக்கலாம். பத்திரிகையாளராக ஆக வேண்டும் என்பதே என் கனவு. நான் தற்போது கல்லூரியில் மூன்றாம் ஆண்டு படித்துக் கொண்டிருக்கிறேன். பத்திரிகையாளராக வேண்டும் என்றாலும் தற்போது படங்களில் நடித்துக் கொண்டிருப்பதும் எனக்கு மிகவும் பிடித்துள்ளது என்று தெரிவித்துள்ளார் கௌரி கிஷன்.
* இந்த பதிவு உங்களுக்கு பிடித்திருந்தால் உங்கள் நண்பர்களுடன் பகிர்ந்து கொள்ளுங்கள். நன்றி!
