‘குயின்’ ஜெ. வாழ்க்கை வரலாறே கிடையாது: ஒரே போடாக போட்ட கவுதம் மேனன்

குயின் ஜெயலலிதாவின் வாழ்க்கையை பற்றிய தொடரே இல்லை என்று இயக்குநர் கவுதம் மேனன் தெரிவித்துள்ளார்.

குயின் தொடர்
மறைந்த மன்னாள் முதல்வர் ஜெயலலிதாவின் வாழ்க்கை வரலாற்றை இயக்குநர் கவுதம் மேனன் குயின் என்கிற பெயரில் வெப் தொடராக எடுத்து வருகிறார் என்பது அனைவரும் அறிந்ததே. இந்நிலையில் இந்த தொடரை வெளியிட தடை கோரி ஜெயலலிதாவின் அண்ணன் மகள் தீபா சென்னை உயர் நீதிமன்றத்தில் வழக்கு தொடர்ந்துள்ளார். குயின் தொடரில் ரம்யா கிருஷ்ணன் சக்தி சேஷாத்ரி என்கிற கதாபாத்திரத்தில் நடித்துள்ளார்.

கவுதம் மேனன்
குயின் ட்ரெய்லரை பார்த்தவுடன் இது ஜெயலலிதாவின் கதை தான் என்று அனைவரும் தெரிவித்தார்கள். இந்நிலையில் கவுதம் மேனன் வேறு மாதிரி சொல்கிறார். அதாவது குயின் ஜெயலலிதாவின் வாழ்க்கை வரலாறே இல்லை என்று கவுதம் மேனன் தெரிவித்துள்ளார். குயின் தொடர் வரும் 14ம் தேதி எம்.எக்ஸ். பிளேயரில் வெளியாக உள்ள நிலையில் கவும் இப்படி கூறியுள்ளார். அனிதா சிவகுமரன் எழுதிய குயின் புத்தகத்தை தழுவி தன் தொடர் எடுக்கப்பட்டுள்ளது என்கிறார் கவுதம்.

வெப் தொடர்
அனிதாவின் புத்தகத்தை அடிப்படையாக வைத்து வெப் தொடர் எடுக்கும் உரிமையை எம்.எக்ஸ். பிளேயர் வாங்கியது. அதன் பிறகு அது தன்னை அணுகி வெப் தொடர் எடுக்குமாறு கேட்டதாக கவுதம் மேனன் பேட்டி ஒன்றில் தெரிவித்துள்ளார். படிப்பை பாதியில் நிறுத்தி படங்களில் நடிக்க வைக்கப்பட்ட ஒரு பெண்ணின் கதை தான் அது. அந்த பெண் பின்னர் அரசியலுக்கு வருகிறார். இதற்கும் ஜெயலலிதாவின் வாழ்க்கைக்கும் தொடர்பு இல்லை என்கிறார் கவுதம்.

ஜெயலலிதா அல்ல கலை
அனிதாவின் புத்தகத்தில் வந்த பெண்ணின் பெயர் கலை. அந்த புத்தகத்தின் அடிப்படையில் தொடரை எடுத்துள்ளோம். அது யாரையாவது நினைவூட்டினால் அது எப்படி என் தவறு ஆகும் என்று கேள்வி எழுப்பியுள்ளார் கவுதம். கவுதம் சொல்வது எல்லாம் சரி தான், ஆனால் ட்ரெய்லரை பார்த்த உடனேயே அது ஜெயலலிதா என்று தெரிகிறதே என்கிறார்கள் ரசிகர்கள். குயின் தொடரில் முதல் சீசனில் 11 எபிசோடுகள் உள்ளன என்பது குறிப்பிடத்தக்கது.

* இந்த பதிவு உங்களுக்கு பிடித்திருந்தால் உங்கள் நண்பர்களுடன் பகிர்ந்து கொள்ளுங்கள். நன்றி!