பயமாத்தான் இருக்கு ஆனால் விஜய்க்கு ஒர்க்அவுட் ஆச்சுல: பிக் பாஸ் செல்லக்குட்டி

தனது கெரியர் செல்லும் வழி குறித்து ஹரிஷ் கல்யாண் மனம் திறந்து பேசியுள்ளார்.

ரொமான்டிக் ஹீரோ ஹரிஷ்
பிக் பாஸ் நிகழ்ச்சி மூலம் பிரபலமானவர் ஹரிஷ் கல்யாண். அந்த நிகழ்ச்சி மூலம் அவருக்கு ஏகப்பட்ட ரசிகைகள் கிடைத்தனர். அவரின் கெரியரும் சூடுபிடிக்கத் துவங்கியது. பியார் பிரேமா காதல், இஸ்பேட் ராஜாவும் இதய ராணியும் என்று தொடர்ந்து படங்களை கொடுத்துக் கொண்டிருக்கிறார் ஹரிஷ். அவர் நடித்துள்ள தனுசு ராசி நேயர்களே படம் அடுத்த மாதம் 6ம் தேதி ரிலீஸாக உள்ளது. இந்நிலையில் படத்தின் விளம்பர நிகழ்ச்சிகளில் பிசியாக உள்ளார் ஹரிஷ். அவர் தனது கெரியர் குறித்து டைம்ஸ் ஆஃப் இந்தியாவுக்கு பேட்டி அளித்துள்ளார்.

தனுசு ராசி நேயர்களே
தனுசு ராசி நேயர்களே படத்தின் இயக்குநர் சஞ்சய் பாரதியை எனக்கு 10 ஆண்டுகளாக தெரியும். நான் பியார் பிரேமா காதல் படத்தில் நடித்து முடித்த பிறகு சஞ்சு என்னை அணுகி என்னிடம் ஒரு கதை உள்ளது கேள் என்றார். அவர் திறமை மீது எனக்கு சந்தேகமே இல்லை. சஞ்சய் இயக்குநர் விஜய்யிடம் உதவியாளராக இருந்தவர். தற்போது சஞ்சய்யை ரொம்ப மிஸ் பண்ணுவதாக விஜய் தெரிவித்துள்ளார். படம் வெளியானால் சஞ்சய்யை அனைவரும் பாராட்டுவீர்கள் என்கிறார் ஹரிஷ்.

விக்கி டோனார் ரீமேக்
ஆயுஷ்மான் குரானா நடிப்பில் இந்தியில் வெளியான விக்கி டோனார் படத்தின் தமிழ் ரீமேக்கில் நடிப்பது மகிழ்ச்சியாக உள்ளது. அந்த படத்தை ஏன் யாரும் தமிழில் ரீமேக் செய்யவில்லை என்று நான் வியந்தது உண்டு. இந்த படத்தை ரீமேக் செய்யும் கிருஷ்ணா இயக்குநர் விஜய்யிடம் உதவியாளராக இருந்தார். அவர் தெலுங்கில் நாக சைதன்யாவை வைத்து யுத்தம் சரணம் என்கிற படத்தை இயக்கியுள்ளார். விக்கி டோனார் ரீமேக்கில் தமிழ் ரசிகர்களுக்கு ஏற்ப சில மாற்றங்கள் செய்துள்ளார். இந்தியில் அன்னு கபூர் நடித்த கதாபாத்திரத்தில் விவேக் நடிக்கிறார் என்று ஹரிஷ் கூறியுள்ளார்.

டிராக் மாறணும்
நான் அடுத்தடுத்து ஒப்புக் கொண்டுள்ள படங்கள் அனைத்தும் காதல் கதை கொண்டவை. அதனால் என்னை லவ்வர் பாய் என்று முத்திரை குத்தி விடுவார்களோ என்ற கவலை உள்ளது. ஆனால் நான் நடிக்கும் படங்கள் காதல் கதை கொண்டவை என்றாலும் ஒவ்வொன்றும் வித்தியாசமானவை. நான் ரூட்டை மாற்ற வேண்டும் என்பதை உணர்ந்து கொண்டேன். பரியேறும் பெருமாள் போன்ற படத்தில் நடிக்க விரும்புகிறேன். மேலும் ராட்சசன் போன்று த்ரில்லர் படங்களிலும் நடிக்கும் ஆசை உள்ளது. இது தவிர சந்தோஷ் சுப்ரமணியம் போன்ற படத்திலும் நடிக்கணும். இது எல்லாம் நடக்க வேண்டும் என்றால் நல்ல ஸ்க்ரிப்ட்டுகள் கிடைக்க வேண்டும். விஜய் சார் நடிக்க வந்த புதிதில் நிறைய காதல் படங்களில் நடித்தார். ஆனால் அதன் பிறகு டிராக் மாறிவிட்டார். அவரை போன்று எனக்கும் நடக்கும் என்று நம்புகிறேன் என்று ஹரிஷ் கல்யாண் தெரிவித்துள்ளார்.

* இந்த பதிவு உங்களுக்கு பிடித்திருந்தால் உங்கள் நண்பர்களுடன் பகிர்ந்து கொள்ளுங்கள். நன்றி!