மேயாத மான் – சினிமா விமர்சனம்


நாயகன் வைபவ் தன் தங்கை இந்துஜாவுடன் வாழ்ந்து வருகிறார். தாய், தந்தை இழந்த இவர், தங்கை மீது அதிக பாசத்துடன் இருந்து வருகிறார். மேலும் மேயாத மான் என்ற மெல்லிசைக் குழு ஒன்றை நடத்தி வருகிறார். இவர் நாயகி பிரியாவை மூன்று வருடங்களாக ஒருதலையாக காதலித்து வருகிறார்.

தான் காதலிப்பதை, பிரியாவிடம் சொல்லாமலே இருந்து வருகிறார். ஒரு கட்டத்தில் பிரியாவிற்கு, வேறொருவருடன் நிச்சயமாகிறது. இதையறிந்த வைபவ் தற்கொலை முயற்சிக்கு செய்கிறார். இதனை தடுக்கும் முயற்சியாக வைபவின் நண்பர் விவேக் பிரசன்னா, பிரியாவிடம் சென்று வைபவின் காதலை சொல்கிறார். மேலும் நீ வெறுக்கும் அளவிற்கு பேசினால், அவன் தற்கொலை முயற்சியில் இருந்து மனதை மாற்றிக் கொள்வான் என்று கூறி பேச வைக்கிறார். அதன்பின் வைபவ் தன்னை எப்படியெல்லாம் காதலித்தார் என்பதை பிரியா தெரிந்துக் கொள்கிறார்.


இதனால், தன்னுடைய திருமணத்தை தள்ளி வைக்கிறார். நாளடைவில் இவர்களுக்குள் காதல் ஏற்படுகிறது. பின்னர், ஒரு பிரச்சனையால் இருவரும் பிரிந்து விடுகிறார்கள். இறுதியில் இருவரும் காதலில் ஒன்று சேர்ந்தார்களா? இல்லையா? என்பதே படத்தின் மீதிக்கதை.

நாயகனாக நடித்திருக்கும் வைபவ், லோக்கல் ஏரியாவில் வாழ்ந்துக் கொண்டு எல்லாத்தையும் வெளிப்படையாக பேசக்கூடியவராக நடித்திருக்கிறார். நாயகியாக நடித்திருக்கும் பிரியா பவானி சங்கர், நட்புக்காக எதையும் செய்யக்கூடிய கதாபாத்திரத்தை ஏற்று சிறப்பாக செய்திருக்கிறார். படம் முழுக்க அழகு பதுமையாக வந்து செல்கிறார்.

வைபவ்விற்கு தங்கையாக நடித்திருக்கும் இந்துஜா, துணிச்சலான கதாபாத்திரத்தில் தைரியமாக நடித்திருக்கிறார். யதார்த்தமாக நடித்து மனதில் பதிந்திருக்கிறார். வைபவ்விற்கு பிறகு படத்தில் அதிகமாக கவர்வது அவரது நண்பராக வரும் விவேக் பிரசன்னா. படம் முழுக்க ஹீரோ கூடவே வந்து, நடிப்பில் ஸ்கோர் செய்திருக்கிறார்.


ஒரு குறும்படத்தை முழு படமாக இயக்கி இருக்கிறார் இயக்குனர் ரத்னகுமார். இதனால் படத்தின் திரைக்கதையில் தோய்வு ஏற்பட்டிருக்கிறது. தொடர்ச்சி இல்லாதது போல் இருக்கிறது. ஆங்காங்கே வரும் காமெடி காட்சிகள் ரசிகர்களை சோர்வடைய விடாமல் காப்பாற்றி இருக்கிறது. படத்தை இன்னும் கொஞ்சம் சுருக்கி இருக்கலாம்.

சந்தோஷ் நாராயணன் மற்றும் பிரதிப் குமார் ஆகியோர் இசையமைத்திருக்கிறார்கள். இவர்கள் இசையில் படத்தில் நிறைய பாடல்கள். ஒவ்வொன்றையும் ஒவ்வொரு மாதிரி உருவாக்கி இருக்கிறார்கள். இது எந்தளவிற்கு கவர்ந்திருக்கிறது என்று ரசிகர்களுக்குத்தான் தெரியும். விது ஐய்யனாவின் ஒளிப்பதிவு படத்திற்கு பலம் சேர்த்திருக்கிறது.

மொத்தத்தில் ‘மேயாத மான்’ மேயவில்லை.

* இந்த பதிவு உங்களுக்கு பிடித்திருந்தால் உங்கள் நண்பர்களுடன் பகிர்ந்து கொள்ளுங்கள். நன்றி!